Anekdotas del saléu nes buries agües de internete.
Anekdotas de la navegación en las borrascosas aguas de internete.

19 febrero 2008

CONVOCATORIA: EL 21 Febreru EN plaza l´humedal, Xixón


manifestación col lema “Nosotres decidimos” y con salida na Plaza L’Humedal va recorrer les cais de Xixón el próximu 21 de febreru dende les 19.30.

COMUNICÁU CONSENSUÁU ENTE LES ORGANIZACIONES CONVOCANTES

Les actuaciones xudiciales d’estos díes, qu’otra vuelta llevaron a delles muyeres a los xulgaos por interrumpir voluntariamente’l so embarazu, amuesen la situación d’inseguridá xurídica na que nos dexó a les muyeres la llei del albuertu aprobada nos años 80: una mancadura mal zarrada pa un problema qu’afeuta a milenta ciudadanes cada añu.
Esta ye una llei pa la que l’albuertu ye un delitu, despenalizáu namás si se da cualesquier de los perconocíos supuestos: violación, malformación fetal o peligru pa la salú física o síquica de la madre.
Énte esta situación, queremos, en primer llugar, manifestar el nuestru sofitu y solidaridá coles muyeres investigaes por exercer l’albuertu y colos y coles profesionales qu’hasta esti momentu lo ficieron posible.
Tamién queremos denunciar la violenta campaña que surde dende les estayes relixoses más fundamentalistes y les dreches polítiques ultraconservadores, que nun dulden en sofitar actuaciones xudiciales y n’usar la intimidación, les amenaces, la mentira, l’insultu ya inda la violencia, tanto física como verbal, con tal d’imponer el so modelu de familia patriarcal, qu’atenta escontra la llibertá de les muyeres y ta basáu nel control de la nuestra sexualidá.
Güei, les organizaciones del movimientu feminista, partíos, sindicatos y entidaes que convocamos esti actu, les muyeres y homes que participamos nesta manifestación, desiximos-yos a los poderes públicos, instituciones y partíos políticos y, sobre manera, al gobiernu que salga de les urnes del 9 de marzu, un compromisu claru y decidíu pa que l’albuertu se reconoza como un drechu, exercíu dende la llibre decisión de les muyeres y garantizáu na rede sanitaria pública.
Un drechu contestualizáu nun marcu normativu ampliu que seya a garantizanos el nuestru drechu a la salú nel sentíu más ampliu y, poro, seya a afitanos los nuestros drechos sexuales y reproductivos, acompangándose de midíes qu’aseguren la educación sexual en tolos centros escolares y l’accesu a los métodos anticonceutivos d’emerxencia con cuenta a la Seguridá Social.

Publicar un comentario
 
inicio