Anekdotas del saléu nes buries agües de internete.
Anekdotas de la navegación en las borrascosas aguas de internete.

18 marzo 2008

Resolución de la comisión executiva d'Izquierda Xunida en rellación colos resultaos de les eleiciones xenerales

17-03-2008.
La Comisión Executiva d'Izquierda Xunida d'Asturies comparte cola Comisión Permanente d'Izquierda Unida que “Los resultaos algamaos por Izquierda Xunida esti pasáu 9 de marzu son claramente insatisfactorios. Midíos en función de los oxetivos que se persiguíen son un fracasu con pocos matices. Proponíamos nestes eleiciones meyorar lixeramente o asegurar la representación de nueso y tratar de condicionar el futuru escenariu políticu mediante un xiru a la izquierda. Ye evidente que nun algamamos nada d'eso y qu'una pérdida d'un 20 por cientu de los votos camudaren nuna penalización brutal en términos de representación”. Trescientos mil votos menos dexáronnos con dos diputaos y ensín grupu parlamentariu.

El PSOE ganó claramente pero nun algamó aquello polo que lluchó con tolos sos medios a lo llargo de la campaña, la mayoría asoluta.

Pela so parte el PP meyora los sos resultaos pero, dempués d'una durísima llexislatura, nin tan siquiera acorta la distancia que los separtaba de los socialistes.

En términos xenerales los partíos mayoritarios mantienen la correlación de fuercies preexistente, lo que demuestra que'l clima de crispación que vivimos los dos últimos años favorez a ambos y por ello, ye de temer, va tener continuidá nel periodu qu'agora escomienza.

D'otru lláu, el PSOE quedó colos nacionalistes vascos y catalanes como socios preferentes y ello-y da una fácil coartada pa dar continuidá a la deriva derechizante que ya entamó. Que naide espere que la llei d'atención a la dependencia vaya a desendolcase en base a una rede pública de servicios, que la de la memoria histórica se ponga en marcha a curtiu plazu, que camude la regulación del albuertu hacia una norma de plazos o que'l coste del enfriamientu económicu nun fine siendo endosáu a los trabayadores, por nun falar de lo peligrosu que diben resultar p'Asturies tales xuntanzes a la hora de determinar el nuevu sistema de financiación autonómica o de concretar inversiones nos Presupuestos Xenerales del Estáu.

N'Asturies Izquierda Xunida-Bloque por Asturies-Los Verdes tuvimos la meyor candidata y fizimos la meyor campaña. Acertamos machacando cola idea de que'l PSOE tenía garantizada la victoria y peleaba por la mayoría absoluta ocultando al so candidatu atechándolu embaxo'l paraguas de Zapatero; tamién en que'l PP nun diba ser quien a incrementar el so sofitu con un candidatu que xeneraba fuertes recelos fuera d'Uviéu.

Contamos na campaña col trabayu de la inmensa mayoría de la organización que participó comprometida y cohesionada como facía munchu tiempu que nun ocurría. Algamamos cásique 50.000 votos, nueve mil menos que nes llexislatives anteriores. Laura algamó'l meyor resultáu que naide n'Izquierda Xunida podía algamar nes actuales circunstancies. Dientro del fracasu xeneral, col 7,26% tuvimos el meyor resultáu de tol Estáu (inclusive les autonómiques andaluzes), probablemente tamién porque siguimos teniendo la estructura organizativa más fuerte y mantenemos la presencia n'importantes movimientos sociales.

El descensu más importante diose nos municipios de les cuenques mineres (en Mieres baxamos 2,8 puntos; en Llangréu 3,8; en Quirós 5,1 y en Degaña 5,8) y nes grandes ciudaes (Uviéu y Avilés 1,2 y en Xixón 1,5).

Pol contrariu diéronse xubes en pequeños municipios nos qu'afitamos organización (Nava 1,4 puntos; en Caso uno; Santalla d'Ozcos 14,2; El Franco 2,8 y en Cangas de Narcea 2,2).

Trátase d'un fenómenu que ya se dió nes Autonómiques nel conxuntu del Estáu y agora vuelve a dase (las pérdes mas marcaes nestes eleiciones diéronse nes grandes ciudaes de la Comunidá Valenciana, Madrid, Andalucía y Cataluña).

Resulta mezquino e inxustu pretender facer responsable de los malos resultaos a Gaspar Llamazares, candidatu designáu directamente poles bases, que fizo un magníficu trabayu como candidatu, diputáu y coordinador xeneral, a pesar de les zancadielles y desllealtaes de sectores de la organización y de dirixentes que lleven ocupando responsabilidaes internes e institucionales dende la dómina de Santiago Carrillo.

Les razones del nuesu descalabru tan, en primer llugar, precisamente neses miseries internes, na actuación antidemocrática de quienes nunca aceuten la derrota y treslladen hacia fuera la imaxen de división.

Tienen la so base, amás, na imperfección d'un sistema democráticu cuya llei ellectoral foi diseñada pa castigar a la tercer fuercia política d'ámbitu estatal, contribuyendo a afitar na mentalidá de los electores de la mayoría de les circunscripciones, convocatoria tres convocatoria, la certeza de que ye imposible qu'IX algame representación. Ye un escándalu que con cásique un millón de votos tengamos dos diputaos y Convergencia i Unió con trescientos mil menos tenga diez escaños. Ye ésti'l terrén que facilita'l cultivu del voto útil que tan buenes colleches proporciona al PSOE.
Tamién nun bipartidismu artificial, provocado nun tanto pola voluntá de los electores cómo pol sistema electoral, que nestes xenerales viose escandalosamente afitáu pola sumisión de los medios de comunicación y, sobre manera, polos patéticos debates ellectorales a dos, absurdos monólogos sucesivos, que presentaben como única opción la de tener qu'escoyer ente'l PP y el PSOE. Ensín dubia ello contribuyó de forma destacada a que cásique la totalidá de les formaciones polítiques pequeñes perdieren representación y que la próxima llexislatura sía la que menos grupos parlamentarios vaya tener, cinco, de la xoven democracia de nueso.

Igualmente, pol abusu del argumentu del mieu a una PP montaraz y clerical por parte d'un PSOE qu'aspira a ocupar tol espaciu de la izquierda, negando que, al contrariu que na derecha, la pluralidá n'aquella ye ideolóxica y de nun tener referente ellectoral va situase na abstención.

Finalmente, pola irrupción sangrienta d'ETA nel cierre de campaña que de nuevu convirtiose nun llamamientu al inconsciente colectivu trayendo a primer planu la polarización en tornu a la llucha antiterrorista de tola llexislatura anterior.

En tou casu, necesitamos una reflexión a fondu sobre les característiques del proyectu políticu de nueso y afrontar los cambios necesarios que superen los errores cometíos y, a la vez manifiesten tantu la diferencia ideolóxica como la incidencia positiva nas condiciones de vida de quienes son mayoría na sociedá.

Nun hai duda de qu'hay un espaciu a la izquierda del PSOE, un espaciu de cambiu y tresformación social qu'apuesta por superar les desigualdaes, vincular desarrollu y mediu ambiente y avanzar hacia un modelu federal del Estáu, porque hai munchos ciudadanos que nun se sienten representaos nin pol PSOE nin pol PP y porque daquién debe asumir el compromisu de defender los derechos de la muyer, de les “lleendes urbanes”, de los desempleaos, los pensionistes, .... Pero nin tenemos la propiedá de dichu espaciu, nin paez que temos acertando na manera d'ocupalu.

La convocatoria d'una Asamblea para mediaos de xunu tien que servir pa entamar esa reflexón y, a partir de les conclusiones, iguar un instrumentu útil que sirva a esos ciudadanos y sía'l so referente de movilización y representación institucional, capaz d'algama la so confianza nos procesos ellectorales.

Hasta la cellebración de l'Asamblea la direición tien qu'exercer toles sos competencies como garantía estatutaria de la limpieza y tresparencia del procesu asambleariu; d'este últimu tien que surdir una nueva dirección plural y fuerte, ensín el lastre de fósiles políticos.

Vivimos un momentu difícil, pero que naide s'apresure a danos por liquidaos; siguimos representando la historia y la tradición de lluchadores heroicos, poro nun tenemos derechu nin a renunciar nin a rendinos. Sobre manera n'Asturies, onde mantenemos la nuesa fuercia, los nuesos conceyales, alcaldes y diputaos y ratificamos la voluntá de continuar trabayando políticamente cada día pa sacar p'alantre'l programa electoral col que concurrimos a les eleiciones autonómiques y municipales y los compromisos qu'asumimos nestes xenerales, amás de dir sentando les bases que garanticen que dientro de tres años temos nes meyores condiciones p'afrontar los retos ellectorales.

Nos próximos díes, na forma que determinen les organizaciones llocales, vamos poner en marcha un despliegue con presencia de tolos representantes institucionales n'asamblees y alcuentros con movimientos sociales, fundamentalmente n'aquellos municipios nos que'l descensu foi mas marcáu, cola finalidá d'aumentar los anclaxes sociales qu'ayudaron n'Asturies a resistir l'huracán.

Tamién afitaremos, na midía de lo posible, a les organizaciones que surdieren en zones de débil implantación, pa sofitar a consolidar el crecimientu que se dio.

Amás, intensificaremos la campaña d'afiliación que ta dando buenos resultados (trescientos nuevos afiliaos en menos d'un añu), buscando formules que propicien la incorporación estructurada de xóvenes.

......Güei ye un clamor n'España la necesidá de camudar la llei electoral y por eso vamos volcanos en recoyer los sofitos necesarios pa promover una movilización social que-y de puxu a una reforma pa garantizar una mayor proporcionalidá na representación.

En mayu debemos poner en marcha'l Foru de Reflexón qu'alcordamos crear na nuesa última Asamblea p'analizar de forma abierta y con otros la realidá cambiante y les necesidaes d'Asturies, dende la perspectiva de concretar un proyectu de Comunidá Autónoma cara al futuru que representa la siguiente xeneración, ensín les premures de les convocatories electorales.

Y vamos participar con tola ilusión y la enerxía na Asamblea Federal, faciendo valer, pol bien del proyectu, la nuesa visión y lo que representamos.

A estes xeres convocamos a los nuesos militantes y a los nuesos collacios.

Publicar un comentario
 
inicio